ഒറ്റമുലച്ചി

 September 2013 മഴവില്ല് മാഗസീൻ വാർഷികപതിപ്പിൽ പ്രസിദ്ധീകരിച്ചു വന്നത് :
click here

"ഹെന്ത് !! നിനക്ക് ഒറ്റമുലച്ചിയെ അറിയില്ലെന്നോ."

അന്തം വിട്ടു നില്കുക്കയാണ് എന്റെ അമ്മായിയുടെ മോൾ. ഞാൻ ഒറ്റമുലച്ചിയെ പറ്റി കേട്ടിട്ടില്ല എന്ന് അവളോട്‌ പറഞ്ഞു പോയി.
"ഇല്ല ഞാനിപ്പോ ഇതാദ്യം കേൾക്കാണ്!"
അവൾ വിടാൻ ഭാവം ഇല്ല.
"നമ്മടെയൊക്കെ ചെറുപ്പത്തിൽ കുറേ കേട്ട കഥയാണ് . നിനക്കോർമയില്ലേ..അങ്ങനെ ഒരാൾ ശെരിക്കും ഉണ്ടായിരുന്നതായി പറയുന്നു."
"ഇല്ലടീ! നീ ഒന്ന് പറഞ്ഞെ ആരാണെന്നു "
"അതായത്, പണ്ട് പണ്ട്  ഈ പെപ്പെർ സ്പ്രേ , സൂര്യനെല്ലി ഇതൊക്കെ വരുന്നതിനു വളരെ മുൻപ് , നമ്മുടെ നാട്ടിൽ ഒരു ഒറ്റ മുലച്ചി ഉണ്ടായിരുന്നു! അവർക്ക് ഒറ്റ മുലയേ ഉള്ളു! നല്ല വലുപ്പത്തിൽ നീണ്ടു അങ്ങനെ കിടക്കും. അത് കൊണ്ട് നാട്ടുകാരൊക്കെ അവരെ ഒറ്റ മുലച്ചി എന്ന് വിളിച്ചു പോന്നു.  ആ ഒന്നന്നര മുല അവർ ചിലപ്പോ വൃത്തിയായി മടക്കി ചുരുട്ടി ക്ലിപ്പ് ചെയ്തു വെക്കും. നാട്ടിലെ പെങ്കുട്ട്യോളെ ആരെങ്കിലും  ഒന്ന് തോണ്ടാൻ വന്നാലോ, അതല്ല മറ്റു കലാപരിപാടികൾക്ക് വരുന്ന പൂവാലന്മാർ ഉണ്ടെങ്കിലോ, ഒറ്റമുലച്ചിയോട്  പറഞ്ഞാൽ മതി. അവർ ഒരു വരവുണ്ട് ..ഒറ്റ മുല എടുത്തു നല്ലോണം വീശി വീശി ഒരൊറ്റ അടിയാണ്! അതോടെ പത്തു മിനിട്ടു കൊണ്ടു  കാര്യം സാധിക്കാൻ കഴിവുള്ളവന്മാരുടെ ഒക്കെ വിളച്ചിൽ അവ്ടെ നിക്കും!

അങ്ങനെ കാര്യം സാധിക്കാൻ വയ്യാതായപ്പോൾ ഈ പഹയന്മാരോക്കെ ഒന്ന്  കൂടിയാലോചിച്ചു. ഗൂഡാലോചനക്കൊടുവിൽ അവർ ഒറ്റമുലച്ചിക്ക് വിഷം കൊടുത്തു കൊന്നു അത്ര തന്നെ!!
വഷളന്മാരുടെ മുഖത്ത് വിടന്റെ ചിരി പൊട്ടിയപ്പോ നാട്ടിലെ പെണ്‍പിറന്നോരെല്ലാരും വാവിട്ടു നെലോളിച്ചു!
അന്ന് മുതലത്രേ നാട്ടില്  ഈ പീഢനം പീഢനം  എന്നൊരു സംഗതി ഉണ്ടായത്!

"അയ്യോ! പാവം ഒറ്റമുലച്ചി!"

ഓഗസ്റ്റ്‌ 14 -വിവാഹ വാർഷികം

ഓഗസ്റ്റ്‌ 14.

കൊല്ലം 9 ആകുന്നു ഞങ്ങൾ ഈ പരിപാടി തുടങ്ങീട്ട്! ഇന്നേ വരെ രണ്ടു പേരും ഒരുമിച്ചു ഒരു വിവാഹ വാർഷികം ആഘോഷിച്ചിട്ടില്ല ..ഓർത്തു വെച്ചിട്ട് പോലും ഇല്ല.!

ഇക്കാലത്തിനിടക്ക് ഞങ്ങൾ പരസ്പരം നല്ല വൃത്തിയായി ക്ക്ഷ, ഞ്ഞ്ഞ്ഞാ, ഭ്ഞ്ഞ്ജ , ത്ഥാധാ, 'പ്ബ്ബ്ഭ , ഒക്കെ ഞെരിപ്പായി വരപ്പിച്ചു !

തെറ്റിദ്ധരിക്കരുത്! "if you love me, also i love you if you " സന്ദർഭങ്ങൾ ആണ് അധികവും ..എന്നാലും ആ പൈങ്കിളി ഞാൻ ഇവിടെ വിളംബുന്നില്ല !

പണ്ട് എന്റെ ഓഫീസിൽ ഉണ്ടായിരുന്ന ഒരു പൈങ്കിളി മോൾ വിവാഹം കഴിഞ്ഞ ഉടനെ ഉള്ള നിർവൃതിയിൽ ഡിങ്കോൾഫിയായി കൊണ്ട് " ഓ ! എന്റെ ദൈവമേ ! ___ച്ചായനെ ഞാൻ നേരത്തെ പരിചയപ്പെട്ടില്ലല്ലോ ! അത്ര അധികം സ്നേഹം കൂടി എനിക്ക് കിട്ടുമായിരുന്നല്ലോ! " എന്ന് ആനന്ദപുളകിതയായി മൊഴിഞ്ഞത് ഞാൻ ഈ അവസരത്തിൽ ഓർത്തു കൊള്ളട്ടെ!!

ഇവ്വിധം പൊതുജനത്തെയും വീട്ടുകാരെയും ഇക്കിളിപ്പെടുത്തില്ല എന്ന് ഞാൻ അന്നേ മനസ്സിൽ "note the point! " മോളാരാ ഞാൻ ?!
---------------------------------------
മല്ലിപ്പൊടി നൂറ്, മുളക്പൊടി അമ്പത്..പിന്നെ രണ്ടു രാധാസും ! ഇതാ ഇപ്പം ഞമ്മന്റെ "family status "!
പുരുഷു ഞങ്ങളെ അനുഗ്രഹിക്കണം !

മൊഹബ്ബത്ത്

അടുക്കു പത്തിരിയില്‍ അടക്കി വെക്കുന്നത് ന്റെ പിരിശം..

നെയ്പത്തിരിയില്‍ പൊരിച്ചു കോരുന്നത് ന്റെ മൊഹബ്ബത്ത്..

അലീസയിൽ കിടന്നു വേവുന്നത്‌ ന്റെ ഖൽബ്..
മുട്ടമാലയിലെമ്പാടും മ്മടെ പ്രേമമാലകള്‍...

പഴം നിറച്ചതില്‍ നിറയുന്നു മ്മടെ കിനാവുകള്‍..
അതിശയപത്തിരിയിലും അതിശയമായ്‌ മാരന്റെ മൊഞ്ച് ..

തോനെ തോനെ ഓനെ പഞ്ചാര പലഹാരമൂട്ടി
പിരിശം പിരിശം കൂട്ടി അരികത്തു ഞമ്മളും

വിശേഷണങ്ങൾ

വിശേഷണങ്ങൾ ഏറെയാണ്‌ പുരുഷാ
നിൻറെ ദാനം ഞങ്ങൾക്കായ്..

സേവക കാമിനി മന്ത്രി വേഷങ്ങളിൽ
മിടുക്കിൻ പര്യായം ഞങ്ങളെങ്കിലും

ആരോപിച്ചീടുന്നു പുരുഷാ നീ
ഞങ്ങളെ "പിൻ ബുദ്ധി"യെന്നു

നീയും നിൻറെ പ്രജനികളുമാകും ഞങ്ങളുടെ  ലോകമെങ്കിലും
പരിഹസിക്കുന്നു നീ "ഹാ! നിങ്ങളുടെ ലോകം ചെറുതെന്ന്"

നെടുംതൂണായ്  തണലായ്‌ നിനക്കൊപ്പം ഉണ്ടെങ്കിലും
നാലാൾ പണി പരാതിയേതുമില്ലാതെ ചെയ്യുമെങ്കിലും

വിശേഷണം കനിഞ്ഞനുഗ്രഹിച്ചിരിക്കുന്നു
നീ ഞങ്ങളെ "അബലകൾ, ചപലകളെ'ന്നു ..

വിശ്വത്തെ താങ്ങും സ്നേഹകരങ്ങളെങ്കിലും
ചൊല്ലുന്നൂ "വിശ്വവിപത്തിൻ നാരായ വേരുക'ളെന്നു

ആത്മാഭിമാനത്തിൽ പോറും വിശേഷങ്ങളിവ്വിധമെങ്കിലും
അറിയുക! പുരുഷാ..

നിന്നെ ഞങ്ങൾ  സ്നേഹിച്ചു കൊണ്ടേ ഇരിക്കുന്നു
നീ തന്നെയാണ് ഞങ്ങളുടെ ലോകം!!

30 Things I want to do in Ramadan

1. ഉമ്മ -ഉപ്പാനെ വിളിച്ചു പൊരുത്തം ചോദിച്ചു കൊണ്ട് റമദാന്‍ തുടങ്ങുക
അല്ലാഹുവിനും റസൂലിനും ശേഷം നമ്മൾ എറ്റവും കൂടുതൽ ആദരിക്കേണ്ടതും സ്നേഹിക്കേണ്ടതുമായ നമ്മുടെ മാതാപിതാക്കളോടാവും നമ്മൾ ഏറ്റവും കൂടുതൽ നന്ദികേട്‌ കാണിച്ചിരിക്കുക. റമദാനിലെ തുടക്കത്തിൽ തന്നെ അവരെ വിളിച്ചു ചെയ്തു പോയ എല്ലാ തെറ്റുകൾക്കും പൊരുത്തപ്പെട്ടു തരാൻ ആവശ്യപ്പെടുകയും അവരുടെ അനുഗ്രഹത്തോടെ റമദാനു തുടക്കമിടുകയും ചെയ്യണം.

2. വിശുദ്ധ ഖുറാൻ പഠനം
30 നാൾ കൊണ്ട് ഖുർആൻ മുഴുവനും ഒരാവർത്തി അർത്ഥസഹിതം വായിച്ചു തീർക്കണം. അറബി ഭാഷ പഠനവും ഹദീസ് പഠനവും കൂടാതെ ദിനവും ഒരു ചെറിയ സൂറത്ത് ഹൃദിസ്ഥമാക്കാൻ ശ്രമിക്കും.

3. ദിക്കരുകൾ അധികരിക്കുക
ആദ്യത്തെ പത്ത്, നടുവിലെ പത്ത്,അവസാനത്തെ പത്തിലെ ദുആകൾ കൂടാതെ ദിവസവും ഒരു പുതിയ ദുഅ ഹൃദിസ്ഥമാക്കുക.

4. കുട്ടികൾ ഉള്ളവർക്ക്
ചെറിയ കുട്ടികളെ അവരുടെ ആദ്യത്തെ നോമ്പ് എടുക്കാൻ പ്രോത്സാഹിപ്പിക്കുക. ആറു വയസ്സുള്ള എന്റെ മോന്റെ ആദ്യത്തെ നോമ്പ് ആയിരിക്കും ഈ റമദാൻ.

5. പുണ്യപ്രവൃത്തികളുടെ ഒരു ലിസ്റ്റ് തയ്യാറാക്കും
ചെയ്യുന്ന മുറക്ക് അതിൽ ഒരെണ്ണമെങ്കിലും ഒരു ദിവസം 'tick ' ചെയ്യണം.

6. നമസ്കാരം കുടുംബത്തോടൊപ്പം
ദിവസം ഒരു നമ്സ്കാരമെങ്കിലും കുടുംബത്തിലെ എല്ലാവരും ഒന്നിച്ചു നിർവ്വഹിക്കണം. ത്റാവി നമസ്കാരങ്ങള്‍ കഴിയുന്നതും കുടുംബത്തോടൊപ്പം ജമാത്തായി നമസ്കരിക്കുക


7. കുടുംബക്കാരുമായി അടുപ്പം പുതുക്കുക
ഏറ്റവുമടുത്ത ബന്ധുക്കളോട് അടുപ്പം നിലനിർത്തും. ദീർഘനാളായി ബന്ധപ്പെടാത്തവരെ വിളിച്ചു അന്വേഷണം അറിയിക്കുകയും കഴിയുന്നതും സന്ദർശിക്കാനും ശ്രമിക്കും. പാവപ്പെട്ട ബന്ധുജനങ്ങൾക്കു സഹായം എത്തിച്ചു കൊടുക്കണം ; സുഖമില്ലാത്തവരെ സന്ദർശിക്കണം.

8. വീട് അലങ്കരിക്കുക
ഈ റമദാന് നമ്മുടെ വീടുകൾ വൃത്തിയും ഭംഗിയുള്ളതുമാക്കുക. മഗ്രിബിന് ഊദിന്റെയും അത്തറിന്റെയും ചന്ധനതിരികളുടെയും സുഗന്ധം വഴിഞ്ഞൊഴുകട്ടെ! നോമ്പ് തുറക്ക് നമ്മുടെ വീടുകൾ പ്രകാശ പൂരിതമാകട്ടെ!

9. കണിശതയോടെ സക്കാത്ത്
സ്വത്ത്- വാര്‍ഷിക വരുമാനത്തിന്റെ 2.5 ശതമാനം സക്കാത് അവകാശപ്പെട്ടവർക്ക് എത്തിക്കണം.

10. റമദാനിലെ കൊതിയൂറും വിഭവങ്ങൾ
ഇതിനു മുൻപ് ചെയ്തിട്ടില്ലാത്ത ഒരു വിഭവം ചെയ്തു പഠിക്കണം.
Full plate -ലെ 15 വിഭവങ്ങള്‍ പരീക്ഷിക്കണം

Yummy To my Tummy -ലെ വിഭവങ്ങൾ പരീക്ഷിക്കണം.

11. അത്താഴം
പുലര്‍ച്ചയില്‍ സുബഹിക്ക് മുന്‍പ് സുന്നത്തായ അത്താഴം ഒഴിവാക്കില്ല.

12. കുട്ടികൾക്കായ്‌
ഈ റമദാന് കുട്ടികൾക്ക് പരിശുദ്ധ റമദാനിലെ കഥകൾ പറഞ്ഞു കൊടുക്കണം. റമദാൻ സ്പെഷ്യൽ ആയി ഒരു ധഫ്ഫു മുട്ടും പട്ടവും വാങ്ങി കൊടുക്കുക. അത്താഴത്തിനു ധഫ്ഫു മുട്ടി എഴുന്നേൽപ്പിക്കണം. ഈ റമദാൻ അവരുടെ ഓർമ്മത്താളുകൾ നിറക്കട്ടെ.

13. ഒരു ദിവസം ഒരു സുഹൃത്തിനെയെങ്കിലും വിളിച്ചു സൗഹൃദം പുതുക്കുക. കാലാന്തരത്തിൽ അവഗണിക്കപ്പെട്ടു പോയ മുപ്പതു സുഹൃത്തുക്കളെയെങ്കിലും തിരിച്ചു കിട്ടും.

14. ഇഷാ നമസ്ക്കാരത്തിനു ശേഷം അല്പം ടേബിള്‍ ടെന്നീസ് /വ്യായാമം.
ഉർജസ്വല ആയിരിക്കണം.

15. ബാംഗ്ലൂര്‍ മലയാളികൾക്കായ്‌
ശിവജി നഗറിലെ(ബാംഗ്ലൂര്‍) തെരുവോരങ്ങളിലെ റമദാന്‍ തുടിപ്പുകള്‍ അറിയുക. മട്ടണ്‍ ശീഖ് കബാബ് , രൂഹഫ്സ, ഗുലാബി ലസ്സി തുടങ്ങിയ പാനീയങ്ങളും ശെർബതുകളും ആവോളം ആസ്വദിക്കണം.

16. നോമ്പ് തുറ
കുറഞ്ഞത് 3 മുസ്ലിം കുടംബങ്ങളിലെ നോമ്പ് തുറക്ക് ക്ഷണം സ്വീകരിച്ചു കൂട്ടത്തോടെ ഇഫ്ത്താരിൽ പങ്കാളിയാകണം

17. ഇസ്തിഗ്ഫാർ
അനുഗ്രഹങ്ങൾകും പാപമോചനത്തിനുമായും വേണ്ടി അല്ലാഹുവിനോട് പ്രാര്‍ഥിക്കുക.പ്രത്യേകിച്ചു അവസാനത്തെ പത്തിൽ ദുആകളും സുജൂദും അധികരിക്കണം. അനുഗ്രഹങ്ങൾക്കെല്ലാം സ്രഷ്ടാവിനോട്‌ നന്ദി പ്രകടിപ്പിക്കണം.

18. സംസാരത്തിലെ മിതത്വം
പിരിവടിയും പുളുവടിയും കുശുമ്പും കുന്നായ്മയും ഫേസ്ബുക്കിലെ ദാവടിയും കുറക്കണം! നല്ലത് മാത്രം പറയുക ; അനാവശ്യ സംസാരം ഒഴിവാക്കണം!


19. Mosque road ,frazer town -ലെ നോമ്പ് തുറ
mosque റോഡ്-ല്‍ എല്ലാ റമദാനിലും ഒരു കിലോമീറ്ററോളം നീളത്തിൽ ഒരുക്കിയിട്ടുള്ള ഹൈദരാബാദി മുസ്ലിം വിഭവങ്ങൾ നിറഞ്ഞ സ്ടാളുകളിൽ ഇവിടെ ഹലീം ആണ് താരം! കൂടാതെ പറാത്ത നിറച്ചത്, ഹൈദരാബാദി ബിരിയാണി, കബാബ്‌, ചിക്കൻ സ്ടിക്ക്സ്, സർബത്ത്, ഫലൂദ എന്നിവയും വിടില്ല!! വായിൽ പത്തു കപ്പലോടിക്കാം !

20. പാവങ്ങള്‍ക്കായി നോമ്പ് തുറ
ചുറ്റുവട്ടത്തുള്ള ദരിദ്രരായ കുടുംബങ്ങളെ തിരഞ്ഞു കണ്ടെത്തി അവര്ക്ക് ഐശ്വര്യപൂർണമായ നോമ്പ് തുറ സമ്മാനിക്കണം.

21. ബാംഗ്ലൂരിലെ വാര്‍ഷിക "റമദാന്‍ സംഗമം 2014" പങ്കെടുക്കണം
venue : Nalapad House , palace ground
date : ജൂലൈ 13 , 1pm-8pm

22. സദഖ അധികരിപ്പിക്കുക
വീട്ടിൽ ആവശ്യത്തിലധികം വരുന്ന വസ്ത്രങ്ങള്‍ പാത്രങ്ങള്‍, കളിപ്പാട്ടങ്ങള്‍, ധാന്യങ്ങള്‍ എന്നിവ വിതരണം ചെയ്യും

23. ആദ്യത്തെ organic റമദാൻ
ഈ റമദാനിലെ പാചകം കഴിയുന്നതും organic ആക്കണം. ഉപ്പു തൊട്ടു കർപ്പൂരം വരെയുള്ള എല്ലാ ചേരുവകളും കഴിയുന്നതും വിഷാംശം ഇല്ലാത്തതും രാസവസ്തുക്കൾ ഇല്ലാത്തതുമായവ ശീലിക്കണം. മനുഷ്യനെ ഭക്ഷിക്കുന്ന വിഷമയമായ എല്ലാ പാക്കറ്റ്/ ഫാക്ടറി ഉൽപ്പന്നങ്ങളും ഒഴിവാക്കാൻ ശ്രമിക്കും.

24. ജിഹാദ് അല്‍-നഫ്സ്
സ്വന്തത്തോടുള്ള ജിഹാദ് റമദാനിൽ ഇരട്ടിപ്പിക്കുക. മാറേണ്ട ദുശ്ശീലങ്ങളോടും മോശം സ്വാഭാവങ്ങളോടും അടുത്ത റമദാൻ വരെ പോരാട്ടം.

25. അയല്‍വാസികളുമായി റമദാന്‍ രുചികള്‍ പങ്കു വെക്കുക
നോമ്പ് തുറക്കായി ഉണ്ടാക്കുന്ന രുചികരമായ വിഭവങ്ങളിൽ ഒരു പങ്ക് സ്നേഹത്തോടെ അയലത്തുള്ളവർക്കായ്‌!

26. സഹോദര സമുദായത്തിലെ സുഹൃത്തുക്കൾക്കായ്
കുറഞ്ഞത്‌ മൂന്ന് അമുസ്ലിം സുഹൃത്തുക്കൾക്കായി ഇഫ്താർ ഒരുക്കണം. നോമ്പിന്റെ ചൈതന്യം അവരുമായ് പങ്കു വെക്കും.

27. ഇതിക്കാഫ്
അവസാനത്തെ പത്തിൽ പള്ളിയില്‍ രാത്രി ഇതിക്കാഫ് ഇരുന്നു ലൈലത്തുല്‍ ഖദറ് തേടുക. കുറഞ്ഞത്‌ ഇരുപത്തേഴാം രാവെങ്കിലും. നീണ്ട ആര് വർഷങ്ങളും രണ്ടു കുട്ടികൾക്ക് ശേഷവും എന്റെ ആദ്യത്തെ ഇതിക്കാഫ് ഇരിക്കൽ ആയിരിക്കും ഈ ഇരുപത്തേഴാം രാവിന്.

28. റമദാനിലെ ചന്ദ്രിക ദര്‍ശിക്കുക
ആഹ്ലാദം ഉറ്റവരും ഉടയവരുമായും പങ്കു വെക്കും.

29. ഫിത്ര്‍ സകാത്ത്
ഫിത്ര്‍ സകാത്ത് ഇശാക്ക് ശേഷം അർഹരായവർക്ക് എത്തിച്ചു കൊടുക്കും അല്ലെങ്കിൽ അത് നിർവഹിക്കുന്ന സംഘടനകൾക്ക് എത്തിച്ചു കൊടുക്കണം.

30. പെരുന്നാൾ ആഘോഷം
ഗ്രൌണ്ടിലെ പെരുന്നാള്‍ നമസ്കാരം, മൈലാഞ്ചി,പുത്തനുടുപ്പ്, കുട്ടികൾക്ക് പെരുന്നാപ്പൊടി!

Ahlan Ramadan 

"പോയത് തായ് വേരാണ്"

     പോയത് തായ് വേരാണ്. വേരുകൾ പറിഞ്ഞു പോരുമ്പോൾ‍ ഉള്ള വേദന അറിയാമോ? അത് കുറച്ചു കടുപ്പം തന്നെ!
        ഞങ്ങള്‍ "യെന്നി" എന്ന് വിളിക്കുന്ന 'സുഹറ' എന്ന് അറിയപ്പെട്ടിരുന്ന സുന്ദരിയായ 'മെഹറുന്നിസ'. എന്‍റെ ഉമ്മാമ! ഇനി നനുത്ത ഒരു ഓർ‍മ്മ മാത്രം!

         വെള്ള പുതച്ചു ഇറങ്ങി പോയത് ഐശ്വര്യവും കൈപുണ്യവും മാത്രമല്ല ഞങ്ങളുടെ ബാല്യം കൂടിയാണെന്ന് ഇപ്പോൾ‍ അറിയുന്നു. ഒരു അമ്പതു കൊല്ലം 'കലപിലാന്നു' ശബ്ധമുഖരിതമായിരുന്ന തറവാട് പൊടുന്നനെ നിശബ്ദം! അവസാനത്തെ കണ്ണി..അതെ പടിയിറങ്ങിയത് ഞങ്ങളുടെ കുട്ടിത്തം ആണ് ..ഞങ്ങളുടെ പൊട്ടിച്ചിരികളും നിലവിളികളും ബഹളങ്ങളും ഒന്നും ഇനി ആ വീടിലുയർന്നു കേൾക്കില്ല ..ഞങ്ങളുടെ കലമ്പൽ അവസാനിച്ചു ..ഞങ്ങൾ‍ കുട്ടികൾ‍ അല്ലാതെയായി, പൊടുന്നനെ പ്രായമുള്ളവരായി മാറി...എന്തെന്നാൽ‍ ഞങ്ങളെ പേരക്കുട്ടികൾ‍ എന്ന് അവകാശപെടാനുള്ള അവസാനത്തെ കണ്ണി അറ്റ് പോയിരിക്കുന്നു!

         നിങ്ങൾ‍ക്ക് 30 ആകട്ടെ , 50 ആകട്ടെ.. നിങ്ങൾ‍‍ക്ക് കുട്ടികളെപ്പോലെ പെരുമാറാൻ ‍ കഴിയുന്നത്‌ നിങ്ങളുടെ ഉമ്മാമാന്‍റെ മുൻ‍പിൽ മാത്രം! നിങ്ങൾ‍ക്ക് അവരെ കെട്ടിപ്പിടിച്ചു ഞെരിക്കാം..ഉമ്മ കൊടുത്ത് കവിൾ‍ നനക്കാം..തുടരെ ഇക്കിളി ഇടാം..അവശേഷിക്കുന്ന നൂൽ‍ തലമുടിതുമ്പ് വെട്ടി 'ഇതെന്താ പൂച്ചവാലോ' എന്ന്  ശുണ്ഠി പിടിപ്പിക്കാം..'പല്ലില്ലാത്ത കിളവീ'.. എന്ന് നീട്ടി വിളിക്കാം ..ഈ സാരിയൊക്കെ മാറ്റിച്ചു ജീൻസും ടോപ്പും ഇടീക്കും എന്ന് കളിയാക്കി ചൊടിപ്പിക്കാം ..ഇക്കിളി ഇട്ടു വീർപ്പു മുട്ടിച്ചു "ഹോ ഈ പെണ്ണിന്‍റെ കാര്യം" , "വെറുതെ ഇരിയെടാ ചെക്കാ " എന്നൊക്കെ ശാസന മേടിക്കാം ! ഇതൊക്കെ ഉമ്മാമാനോട് മാത്രം!

          വഴക്കു പറച്ചിലും കണ്ണുരുട്ടലും ഒക്കെ നമ്മുടെ മാതാപിതാക്കൾ‍ക്ക് ഇവർ‍ റിസർ‍വ്വ്‌ ചെയ്തു വെച്ച്, നമുക്ക് തരാൻ‍ സ്നേഹവും നിറുകയിലൊരു ചുംബനവും മാത്രം. വഴക്ക് പറയാനൊന്നും ഇനി അധികം സമയം ബാക്കി ഇല്ല എന്ന് അവർ‍‍ക്കറിയാമായിരുന്നോ ? സമയം തീരാൻ‍ പോകുന്നത് കൊണ്ടാണോ സ്നേഹത്തിന്‍റെ കൂടെ ഇടിച്ച പുട്ടുപൊടിയും, വരട്ടിയ ഇറച്ചിയും , പുതിയാപ്ലക്ക് കൊലെസ്ട്രോൾ‍ കുറയാനുള്ള കാന്താരി മുളകും ഒക്കെ ഓർത്ത് തന്നിരുന്നത് ?

          കൊളെജിലും ഓഫീസിലും ഒക്കെ ഉള്ളപ്പോൾ‍ ഇടയ്ക്കു വയറു വേദന എന്നൊക്കെ പറഞ്ഞു തറവാട്ടിൽ പോയി അധികവും അടുക്കളയിൽ‍ ചട്ടി വടിച്ചു നക്കൽ ആയിരിക്കും എന്‍റെ പണി!  അത്രക്കുണ്ട് ആ കൈപുണ്യം! ബാക്കി വന്ന 'സ്പെഷ്യൽ " ഒക്കെ മൂടി വെച്ചത് എടുത്തു തരും. രഹസ്യ ചേരുവകൾ ഒന്നും എനിക്ക് പറഞ്ഞു തരുന്നില്ല എന്ന് ഞാന്‍ കെറുവികുമ്പോൾ പാചക റാണിയുടെ അഭിമാനം ആ മുഖത്ത്!
നിർ‍ത്താതെ അച്ചാറും നക്കി നടക്കുന്ന കൌമാരക്കാരൻ‍ പേരക്കുട്ടിയെ നോക്കി "ഇവന് പള്ളേലുണ്ടെന്നാ
തോന്നണ്" എന്നൊക്കെ പറയുന്ന നർമ്മബോധം. സാമ്പത്തിക അച്ചടക്കത്തിന്‍റെ പര്യായം ..വിശേഷണങ്ങൾ ഒരുപാടുണ്ട്!

        ഓർ‍മ്മ വെച്ച നാള്‍ മുതലുള്ള ശീലം ആണ് കെട്ടിപ്പിടിച്ചു ഒരുമ്മ കൊടുത്തിട്ടേ ഇറങ്ങൂ അവിടുന്ന്..അന്നും കൊടുത്തു അവസാനത്തെ ഉമ്മ..വിറങ്ങലിച്ച നിറുകയിൽ ! മൈലാഞ്ചി ചുവപ്പില്ലാതെ കണ്ടിട്ടില്ല ആ നഖങ്ങൾ‍. വെളുത്തു തുടുത്ത കൈവിരലുകളും ചുവന്ന നഖങ്ങളും ഒരികൽ‍ കൂടി തലോടി ഞാൻ‍ നോക്കി നിന്നു..അതും തണുത്തു വിറഞ്ഞിരുന്നു.

       പോയത് തായ് വേരാണ്! വേര് പറിച്ചെടുക്കുമ്പോൾ ഉള്ള വേദന ...